ELISA LOGKON ANTVLEFVN

Mapuce wvnen norzugukafe

Mari mari kom pu ce, iñce Elisa Logkon Antvlefvn pigen, Lefweluan Mapu mew coyugen, ‘cew lefkey luan’ pigelu. Tañi lof mvley Xayen komuna mew, kiñe mvna kvme azleci mapu, aneltulelu forestales mew kom Wajmapu. Feymew ta coyungen mew mvten ta mapuzugken ka zuamtuniekaken ta zugun kewvn mew muley ñi pvju ta pu ce xukiken.
Tañi zuamtukan ta zugun ka azumal, kompañkeyenew tañi kom mogen mew. Universidad de la Frontera Temuko mew wvneltu konvn, cilkatun Pedagogía en Inglés. Ka konvn teatro Azmapu xokiñ mew, tañi pu lamgen egvn mulefulu mapuce ruka mew ka pegelzuguiñ dictadura mew teatro mew yafvluwiyiñ ka xaruxapomuwiyiñ lofce egvn.

Cilkatuel pedagogía pepilenew ñi nieal fijke zuampeyvm kvzawmayal azvmkawe pepilkawvn kimvlal ka azvmal mapuzugun. Fey yeci ñi konvmvn ñi mogen wefxipatual taiñ kewvn, fijpvle kimvltukuken mapuzugun Wajmapu mew ka kake alvkonkimlwe mew.

 Ka koneltun Awkiñ Wajmapu Gulam mew, kiñe femvn koneltulu fij xokiñce zewmalu Wenufoye, rume azci mapuce fandera. Tvfa mew ta maneluwi pu ce xokiñce pewvzpewvzgen mew kvmenon mew pial tvfaci sistema ijamfegelu ka kolonialgelu.

Tañi mvmvlkawvn mew pepikimvlenew ñi kimal rvf ñi cumlen kakewleci Jitunce naq mapu mew, fey mew ta zuamtunien taiñ weycayal nieal kiñe xokiñuwleci pu ce jamal fijke kakewleci xokiñ. Taiñ weycan  rvfkvme feleal gepe rvfinazuamvn ka kizugvnewvn.

Facantv calintukuwvn wvnen norzugukafe mew, pegeyenieal kom zuamtun ka kom xokiñce. Wvñoweftual taiñ kimvn.

Shape